Language   

Meravilhar no·s devo pas las gens [Sirventesc de luy meseys lo qual fes al temps de la mortaudatz e de la mala carestia]

Peire Lunel de Montech



Meravilhar no·s devo pas las gens
si mortaudatz es e grans carestia,
car falcetatz es avols pessamens
qu'es entre nos los aires enficia,
si que per fort l'ayres enficiatz
corromp las gens, per qu'es grans mortaudatz,
e poys los frugz, si que defalhizos
es de totz bes per totas regios.

De totz bos faytz es oy defalhimens,
e de tot mal es grans plentatz tot dia,
ques oy no val ni fes, ni sagramens,
ni santz del cel, amistatz, ni paria.
Cant us homs es en grans necessitatz,
guatges val may que no fay amistatz,
e trop val may fortz obliguacios
que parentatz cant hom es sofrachos.

Los faytz e·ls digz e los cociramens
ha cascus, oy, per aver manentia
si c'om ne met en oblit sos parens
e Dieu, qu'es pietz, e la Verges Maria.
Mays amon trop que Dieu terras e blatz,
tro que sson oy, e par be la vertatz,
que de gran fam laishan, per los cantos,
cridar, braulhar los paubres nesseyros.

A penas vieu degus hom lialmens,
sol qu’aia re que renoyers no sia,
ho de baratz fara tant autramens
que doblara be dos tans la folia,
e lhuns senhals que Dieus aia mostratz
que·ns degra totz aver espaventatz
no·ns membra ponch, per qu’es iratz vas nos,
si que totz jorn nos da percucios.

Escudiers veg e borzes e sirvens
fatz e guoguols e ples de musardia,
qu’a lors molhers fan portar paramens
e draps pinchatz am fort diversa guia.
Be valgra mays c’om des los draps pinchatz
als capelans que Dieus ne fos hondratz,
ho de molhers qu’ordenat aishi fos
c'om lor fes dir las messas e·ls sermos.

Mas si volem que·ns aia causimens
le reys del cel, menbre·ns la vilania
que per nos pres e·ls affans e·ls tormens
que ses lhun tort sostenc que non avia.
E cofessar valham nostres peccatz
be dignamen, es aiam karitatz,
car Dieus e dreytz en temps carestios
vol que dals bes se fassa partisos,

Mos Bels Cristalhs, vos etz lhums e clartatz,
e fons de gaug, que·l mon enlumynatz;
dona, preguatz lo senhor glorios
que vieure·ns lays alegres e joyos.

Lo temps es mals e fort deshordenatz
en tot lo mon a granda pauretatz;
mas preguam tug lo senyor poderos
que·ns gar a temps de nostras falhisos.


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org