Language   

La viéyo villo d’Aigo Morto

Antoine Bigot


Antoine Bigot


La viéyo villo d’Aigo Morto
La villo dou réi Sant Louis
Panlo e maigro darriès si porto
Au bord de la mar s’espandis
Uno tourré coumo un viel gardo
Viho en déforo di rampar
Aouto e sourno liun liun regardo
Regardo la plano e la mar.

L’aubre se clino, l’auro coure
La poussièro volo au camin,
Tout es siau dins la vieio tourre
Mai per tems passa ’ro pas sin.
Li pescaîre que s’atardavon
Dins la niue, souvent entendien
Tantost de fenno que cantavon
Tantost de voues que gemissien.

De qu’éro aco? De presouniero.
De qu’avien fa? Vioula la lei,
Plaça Dieu en ligno proumiero,
La couscienci au dessus dou rei.
Fièri iganaudo, is assemblado
Dou Désert, séguido di siéu,
Lou siaume en pocho, éron anado
A travès champ, per préga Dieu.

Mais li dragoun dou rei vihavon:
Sus la foulo en preiero, zou!
Zou! lou sabre nus, s’accoussavon...
E d’ome de cor e d’ounou
Leu li galèro eron pouplados
E si fenno, i man di dragoun,
En Aigo-Morto eron menado,
E la tourre ero sa presoun.

Souffrissien, li pauri doulento,
La fam, la set, lou fre, lou caud;
Avien li languitudo sento
Dis assemblado e de l’oustau.
Mais vien la fe, counfort e baume
Di cor murtri que reston fier;
Ensemble cantavon li siaume
Dins la presoun coumo au Desert.

Li jour, li mes, lis an passavon,
E noun jamai li sourtissien.
D’uni i soufrenco resistavon,
D’autri, pechaire, mourissien.
Mais sa fe, l’aurien pas vendudo,
Mais soun Dieu l’aurien pas trahi,
Noun! Iganaudo eron nascudo,
Iganaudo voulien mouri.

D’avans ti peiro souleiado
Qu’un autre passe indiferent,
O tourre, a mis iuel siès sacrado,
Siei tout esmougu’n te vesent,
Tourre de la fe simplo e forto,
Simbel de glori e de pieta,
Tourre di pauri fenno morto
Per soun Dieu e sa liberta.



Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org