Lingua   

Li culura da bannera

Alfredo Corsaro
Lingua: Siciliano



Primu maggiu a Purtedda
Si pripara ‘na gran festa
E si chianta la bannera
Ppi jsari tutti a testa

Sunnu poviri braccianti,
Dispirati cuntadini
Hannu caddi ‘nta li manu
Ma ppi cori oru finu

Ppi la festa do travagghiu
A luttari e fari schigghi
Si truvarunu ‘ncampagna
Cch’i cumpagni e li famigghi

Ma ‘u putiri non ammetti
Ppu travagghiu la prutesta
Ne’ disordini suciali
Contru a classi patrunali

Cumpluttanu a l’ammucciuni
I pulitici e i patruni
Pp’affidari a vint’armali
La risposta criminali

Li banditi ccu li mitra
Di dda supra da muntagna
Scarricavunu cartucci
A li genti ‘nta campagna

Ammazzavunu li patri
D‘nnuccenti picciriddi
Trapassavunu li matri
C’abbrazzavunu li figghi

Mentr’u populu sbandava
Tanta genti dda cascava
E ‘na matri si stringeva
A lu so figghiu ca mureva

C’era puru ‘npicciutteddu
C’azziccannu ‘nterra ‘i ita
Strascinannusi chianciva
Ppi circari la so zita

Ppi la liggi fu Giulianu
Lu banditu “galantomu”
Ma darreri a li so mani
Ci su’ nobili assassini

La bannera svintulava
Tutta quanta spirtusata
E purtava li culura
Di dda stragi scialarata

D’erba virdi e sangu russu
E’ tingiuta la campagna
Mentri a morti si prisenta
Ccu la facci tutta janca.


Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org