Language   

Robyn And Gandeleyn

Anonymous




I herde a carpyng of a clerk
Al at yone wodes ende
Of gode Robyn and Gandeleyn;
Was þer non oþer þynge.
Robynn lyth in grene wode bowndyn

Stronge theuys wern þo chylderin non
But bowmen gode and hende,
He wentyn to wode to getyn hem fleych
If God wold it hem sende.

Al day wentyn þo chylderin too
And fleych fowndyn he non
Til it were ageyn euyn;
Þe chylderin wold gon hom.

Half an honderid of fat falyf der
He comyn ayon,
And alle he wern fayr and fat inow
But markyd was þer non;
Be dere God, seyde gode Robyn,
Here of we xul haue on.

Robyn bent his joly bowe,
Þer in he set a flo;
Þe fattest der of alle
Þe herte he clef a to.

He hadde not þe der iflawe
Ne half out of þe hyde,
Þere cam a schrewde arwe out of þe west
Þat felde Robertes pryde.

Gandeleyn lokyd hym est and west,
Be euery syde:
Hoo hat myn mayster slayin?
Ho hat don þis dede?
Xal I neuer out of grene wode go
Til I se his sydis blede.

Gandeleyn lokyd hym est and lokyd west
And sowt vnder þe sunne;
He saw a lytil boy
He clepyn Wrennok of Donne.

A good bowe in his hond,
A brod arwe þer ine,
And fowre and twenti goode arwys
Trusyd in a þrumme;
Be war, war þe, Gandeleyn,
Her of þu xalt han summe.

Be war, war þe, Gandeleyn,
Her of þu gyst plente.
Euer on for an oþer, seyde Gandeleyn;
Mysaunter haue he xal fle.

Qwer at xal our marke be?
Seyde Gandeleyn:
Eueryche at oþeris herte,
Seyde Wrennok ageyn.

Ho xal yeue þe ferste schote?
Seyde Gandeleyn:
And I xal yeue þe on be forn,
Seyde Wrennok ageyn.

Wrennok schette a ful good schote,
And he schet not to hye;
Þrow the sanchoþis of his bryk;
It towchyd neyþer thye.

Now hast þu youyn me on be forn,
Al þus to Wrennok seyde he,
And þrow þe myght of our lady
A bettere I xal yeue þe.

Gandeleyn bent his goode bowe
And set þer in a flo;
He schet þrow his grene certyl,
His herte he clef on too.

Now xalt þu neuer yelpe, Wrennok,
At ale ne at wyn,
Þat þu hast slawe goode Robyn
And his knaue Gandeleyn.

Now xalt þu neuer yelpe, Wrennok,
At wyn ne at ale,
Þat þu hast slawe goode Robyn
And Gandeleyn his knaue.
Robyn lyghth in grene wode bowndyn




Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org