Language   

Quannu diu fici a tia...

Pupi di Surfaro
Language: Sicilian



Quannu Diu fici a tia
forsi ti fici sceccu?
Sutta la vardedda stortu,
scurciatu di lu suli, scottu,
cu’ l’occhi ‘n terra
sempri strascini e ammutti
e cu’ la cuda scacci li muschi.

Populu d’armali, schiavu di la so’ ‘gnuranza,
spreca inutilmenti la so’ scarsa intelligenza.

Quannu Diu fici a tia
forsi ti fici porcu?
Affunnatu ni lu fangu, persu,
chi si danna pi’ spurpari ‘n ossu,
dintra a lu to’ brodu vugghi
e lu distinu agghiutti,
ridi a lu patruni
ca t’ingrassa e poi ti futti.

Populu d’armali, schiavu di li so’ vizi,
spreca inutilmenti tutti li so’ biddizzi.

Ognunu armali, cu’ la propria razza,
artari di crita, banneri di pezza,
‘llu nomu di Diu si scanna e s’ammazza.
Ta tara ta ta tara ta ta
Viva la nustra armalità!

Tutti su’ figli di ‘na mamma pazza,
ca addeva cagnuli e duppu l’arramazza,
né fede, ideologia, non è razionalità.
Ta tara ta ta ta ta ta…
L’ignoranza ammazza ‘a libertà.*

Quannu Diu fici a tia,
e nun ti fici lupu!
Arraggiatu di putiri e farsu,
chi strascini i figghi ni lu fossu,
gunchiu di currivu
sputi e ti scuma la vucca,
ti scatta lu feli,
bruci, arraggi e fai minnitta.

Populu d’armali, schiavu di la so’ superbia,
si ni futti di l’onuri e sbampi ni la raggia.

Populu di cani e muli si fannu la guerra,
scancianu la virità, si spartinu la terra.

Ognunu armali, cu’ la propria razza,
artari di crita, banneri di pezza,
‘llu nomu di Diu si scanna e s’ammazza.
Ta tara ta ta tara ta ta
Viva la nustra armalità!

Tutti su’ figli di ‘na mamma pazza,
ca addeva cagnuli e duppu l’arramazza,
né fede, ideologia, non è razionalità.
Ta tara ta ta ta ta ta…
L’ignoranza ammazza ‘a libertà.*
* tratto da “Mi piaci ‘a libertà” di Bernardino Giuliana


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org