Language   

La straggi di lu pani

Serena Lao
Language: Sicilian



Viniti, ascutati, genti siciliani
vi vogghiu cuntari un fattu traggicu
na straggi ca nun havi eguali
ca fici vèstiri a luttu tanti palermitani.

Era lu 19 ottubbri du 1944.

L’arba nto celu già facia spuntari
na matinata fridda e senza suli
Palermu mi dicava li so’ chiaj
Palermu terra china di duluri.

La guerra avia lassatu li faiddi
negghia nt’all’ariu e celi senza stiddi
occhi sbarrachiati morti strati strati
nenti spiranza e tanta puvirtati!

Lu scuru ammugghiava li pinzeri
la fami era forti cchiù d’aieri
Ancili ca di Ddiu siti mannati
ddu tintu jornu unn’eravu ammucciati!?

La raggia strantuliava la menti e la cuscenza
li picciriddi nun avianu nenti nta la panza!
Li mischineddi nun sapianu cchiù chi fari
a quali santu s’avianu a vutari.

Pinzaru accussì di protestari
davanti a lu Prefettu si ieru a prisintari.
Eranu tanti, eranu picciotti
ddu jornu iddi s’accattaru a morti!

Parianu tanti cani vastuniati
ittavanu vuci pi essiri ascutati
travagghiu e pani vulianu truvari
quali judici li putia cundannari!

Li vuci poi si ficiru cchiù forti
e li surdati arrivaru a frotti
lu primu sparu... doppu lu secunnu
ma nun si sapi cu detti lu cumannu.

Nun sparati… nun sparati!!!
Sunnu picciotti e mancu sunnu armati!
Ma li surdati parianu ’mpazzuti
macari li bummi foru ittati.

Di russu si tincianu li strati
lu sangu ’n terra, li testi scafazzati
Cristu pi l’omu fu ’nchiuvatu ’n cruci
ma dda matina nuddu ’ntisi a Vuci!

Na matri sventurata
saputa la nutizzia curriu pi la strata
a talialla paria la Madonna Addulurata:
“Figghiu, figghiu chi t’hannu fattu!”

E comu quannu era nicu
si lu strincia a lu pettu
l’accarizzava ci vasava i manu
si l’annacava e ci cantava pianu:

“Dormi dormi figghiu amatu
ca to mamma ti duna lu ciatu.
Dormi dormi figghiu miu
pi tia ora ci penza Ddiu”

Di n’autru latu arrivava un gran lamentu:

“Figghiuzzu miu comu t’haiu truvatu
stu ciuri ’n pettu cu ti l’ha’ appizzatu
cu ti scannò fu un malidittu cani
c’ammazza a genti pirchì voli u pani”

Chiuviddicava supra ddu duluri
Palermu certu nun si fici onuri.
Chista è la straggi di la puvirtati
ca fa ammazzari li frati cu li frati.

Curriti tutti, genti palermitani
li vostri frati foru ammazzati comu cani!
Chianciti tutti genti siciliani
ca nun s’ammazza a cu addumanna u pani!

Matri nisciti fora ittati vuci
li vostri figghi foru misi ’n cruci!
La notti scinni e agghiutti cu lu so mantu
nta lu silenziu… di 24 matri si senti lu chiantu!


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org