Lingua   

Wulf ond Ēadwacer [Wulf and Eadwacer]

anonimo




Lēodum is mīnum                     swylce him mon lāc gīfe;
willað hȳ hine āþecgan                    gīf hē on þrēat cymeð.
Ungelīc is ūs.
Wulf is on īege,                     ic on ōþerre.
Fæst is þæt ēglond,                     fenne biworpen.
Sindon wælrēowe                     weras þǣr on īge;
willað hȳ hine āþecgan                    gīf hē on þrēat cymeð.
Ungelīce is ūs.
Wulfes ic mīnes wīdlāstum                     wēnum dogode;
þonne hit wæs rēnig weder                     ond ic rēotugu sæt,
þonne mec se beaducāfa                     bōgum bilegde,
wæs mē wyn to þōn,                     wæs mē hwæþre ēac lāð.
Wulf, mīn Wulf!                     wēna mē þīne
sēoce gedydon,                     þīne seldcymas,
murnende mōd,                     nales metelīste.
Gehȳrest þū, Ēadwacer?                     Uncerne earne hwelp
bireð Wulf tō wuda.
Þæt mon ēaþe tōslīteð                     þætte nǣfre gesomnad wæs,
uncer giedd geador.



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org