Lingua   





Hit wes upon a Scere þors dai þat vre louerd aros
Ful milde were þe wordes he spec to Iudas.

Iudas þu most to Iurselem vre mete for to bugge
Thritti platen of seluer þu bere vp othi rugge.

Þu comest fer iþe brode stret, fer iþe brode strete
Summe of þin cunesmen þer þu meist i-mete.

Imette wið is soster, þe swikele wimon:
Iudas þu were w[u]rþe me stende the wið ston.

Iudas þu were w[u]rþe me stende the wið ston
For þe false prophete þat þu bileuest upon.

Be stille, leue soster þin herte the tobreke
Wiste min louerd Crist, ful wel he wolde be wreke.

Iudas go þu on þe roc, heie vp on þe ston
Lei þin heued i mi barm slep þu þe anon.

Sone so Iudas of slepe was awake
Thritti platen of seluer from hym weren itake.

He drou hym selue bi þe cop þat al it lauede ablode
Þe Iewes out of Iurselem awenden he were wode.

Foret hym com the riche Ieu þat heiste Pilatus:
Wolte sulle thi louerd þat hette Iesus .?.

I nul sulle my louerd for nones cunnes eiste
Bote hit ne for þe þritti platen þat he me bitaiste.

Wolte sulle þi Lord Crist for enes cunnes golde .?.
Nay, bote hit be for þe platen þat he habben wolde.

In him com vr lord gon as is postles seten at mete:
Wou sitte ye postles ant wi nule ye ete .?.

Wou sitte ye postles ant wi nule ye ete .?.
Ic am iboust ant isold to dai for vre mete.

Vp him stod Iudas: Lord am I þat frec .?.
I nas neuer othe stude þer me iþe euel spec

Vp him stod Peter ant spec wið al his miste:
Þau Pilatus him come wid ten hundred cnistes,

Þau Pilatus him come wid ten hundred cnistes
Yet ic wolde, Louerd, for thi loue fiste.

Still þu be Peter, wel I þe icnowe.
Þu wolt fursake me þrien ar þe coc him crowe.



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org