Lingua   

Tartarassa ni voutor

Pèire Cardenal


Pèire Cardenal


Tartarassa ni voutor
No sent tan leu carn puden
Quom clerc e prezicador
Senton ont es lo manen.
Mantenen son sei privat,
E quant malautia-l bat,
Fan li far donassio
Tel que-l paren no-i an pro.

Franses e clerc an lauzor
De mal, quar ben lur en pren!
E renovier e trachor
An tot lo segl' eissamen,
C'ab mentir et ab barat
An si tot lo mon torbat
Que no-i a religio
Que no'n sapcha sa leisso.

Saps qu'endeven la ricor
De sels que l'an malamen
Venra un fort raubador
Que non lur laissara ren:
So es la mortz, que-ls abat,
C'ab catr'aunas de filat
Los tramet en tal maizo
Ont atrobon de mal pro

Hom, per que fas tal follor
Que passes lo mandamen
De Dieu, quez es ton senhor
E t'a format de nien
La trueia ten al mercat
Sel que ab Dieu si combat:
Que-l n'aura tal guizardo
Com ac Judas lo fello.

Dieus verais, plens de doussor,
Senher, sias nos guiren
Gardas d'enfernal dolor
Peccadors e de turmen,
E solves los del peccat
En que son pres e liat,
E faitz lur veray perdo,
Ab vera confessio



Pagina principale CCG

Segnalate eventuali errori nei testi o nei commenti a antiwarsongs@gmail.com




hosted by inventati.org