Language   

Clergue si fan pastór

Pèire Cardenal



Clergue si fan pastór
E son aucizedór;
E par de gran sanctór
Qui los vei revestir,
E-m pren a sovenir
Que n'Ezengris, un día,
Volc ad un parc venir:
Mas pels cans que temía
Pel de mouton vestic
Ab que los escarnic,
Puois manget e traïc
Tot so que li-abelic. ‎

Rei e emperador,
Duc, comte e comtor
E cavalier ab lor
Solon lo mon regir;
Ara vei possezir
A clers la seinhoría
Ab tolre e ab traïr
E ab ypocrezía,
Ab forsa e ab prezic;
E tenon s'a fastic
Qui tot non lor o gic
E sera, quan que tric. ‎

Aissi can son major
Son ab mens de valor
Et ab mais de follor,
Et ab meins de ver dir
Et ab mais de mentir,
Et ab meins de paría
Et ab mais de faillir,
Et ab meins de clerzía.
Dels fals clergues o dic:
Que anc hom non auzic
A Dieu tant enemic
De sai lo tems antic. ‎

Can son en refreitor
No m'o tenc ad honor,
C'a la taula aussor
Vei los cussons assir
E premiers s'escaussir.
Aujas gran vilanía:
Car i auzon venir
Et hom no los en tría.
Pero anc non lai vic
Paubre cusson mendic
Sezen laz cusson ric:
D'aitan los vos esdic. ‎

Ja non aion paor
Alcais ni Almansor
Que abat ni prior
Los anon envazir
Ni lor terras sazir,
Que afans lor sería;
Mas sai son en cossir
Del mon consi lor sía
E com en Frederic
Gitesson de l'abric:
Pero tals l'aramic
Qui fort no s'en jauzic. ‎

Clergue, qui vos chauzic
Ses fellon cor enic
En son comte faillic,
C'anc peior gent non vic. ‎


Main Page

Please report any error in lyrics or commentaries to antiwarsongs@gmail.com

Note for non-Italian users: Sorry, though the interface of this website is translated into English, most commentaries and biographies are in Italian and/or in other languages like French, German, Spanish, Russian etc.




hosted by inventati.org