Cantone de s'òmine in su fossu
Frantziscu Màsala / Francesco MasalaOriginal | Versione italiana di Francesco Masala. |
CANTONE DE S'ÒMINE IN SU FOSSU Ehi, bona zente, leàde unu che a mie, mesu òmine e mesu arveghe, pasturighènde in losas de nuraghes, e faghidèli custa brulla: ponìdeli subra sa conca una raffineria de petroliu de unu matimànnu milanesu. Ehi, bona zente, leàde unu che a mie, unu bòe muliàke in tancas de murdègu e de iscrarèu, e faghìdeli custa brulla: ponìdeli unu cacciavite in manu, a fàgher su sagrestanu in sas cresias de Deus Ozudepèdra. Ehi, bona zente, leàde unu che a mie, unu crapàrzu cun sa cara' e beccu, e faghideli custa brulla: ponìdeli una este e' camerèri in zillèri de sa Costa lsmeralda, inùe s'iscàldana su culu sos prinzipales mussulmanos. Ehi, bona zente, leàde unu che a mie, piscadòre de pische de Aristànis, in vassònes de giuncu, e faghideli custa brulla: ponidechèli in mesu a sa pischìna una fràbica de nèula, gàrriga de mercuriu e de catramu. Ehi, bona zente, leàde unu che a mie, bogadòre de ortìgiu, cun istràles de fogu, e faghideli custa brulla: ponidechèlu in mesu a milli mìssiles, in sas pedras de fogu de una tanca de tiru americana Ehi, bona zente, ite creides chi fàtat, tando, unu comente a mie? Che ruet in su fossu! Che ruet in su fossu!! Che ruet in su fossu!!! E andàde in ora mala. | BALLATA DELL’UOMO NEL FOSSO |